La conceyala de Centros Sociales, Festejos y Mocedá, Covadonga Díaz, presentó esti 7 d’ochobre en Villa Magdalena la esposición de Trages del Sieglu XIX y la Historia del Desarme, que va poder visitase hasta’l 25 d’ochobre.
Díaz destacó la relevancia del Desarme, una fiesta declarada d’Interés Turísticu Nacional, que busca implicar a más xente y especialmente a los barrios y centros sociales. La Conceyalía colabora esti añu cola Cofradía del Desarme pa convertir la celebración nun espaciu d’alcuentru, participación y tresmisión del patrimoniu cultural ovetense.
La esposición recueye 14 traxes venceyaos a participantes d’anteriores ediciones del Concursu d’Indumentaria del Desarme. “Nun ye solo una muestra de vestidos: cada traxe ye una ventana al sieglu XIX, fala d’una dómina y de les diferencies sociales”, esplicó la edil.
Na muestra pueden vese traxes de la alta burguesía, la corte, la Belle Époque, y tamién de maestres y aldeanes, con estampados, encaxes y complementos que ayuden a entender la vida y la moda d’aquella época. Díaz quiso reconocer a les persones que participan nel concursu, que consiguen que les cais d’Oviedo vuelvan al pasáu por unes hores.
El sábadu 17 d’ochobre, a les 17:30 hores, el Paseo del Bombé acoyerá’l X Concursu d’Indumentaria d’Época, con protagonismu pa los centros sociales, que van desfilar en grupos.
El 21 d’ochobre, Villa Magdalena va ser escenariu d’una fiesta d’época abierta a tola familia. Dende les 17:00 hores, el públicu va poder disfrutar d’un desfile de traxes, un baille a cargu d’Amador y talleres de escritura con pluma, lettering y confección de sombreros. La programación complétase con charres los díes 20, 21 y 22 pa acercar la historia del Desarme a la ciudadanía.
Maribel Prieto, de la Cofradía del Desarme, destacó que la esposición “dexa recuperar visualmente aquel Oviedo onde nació’l Desarme, porque nun ye solo gastronomía: ye historia, cultura, convivencia y participación”.
