El Gobiernu del Principáu vien de reforzar el centru de salú de Cangues d’Onís cola incorporación d’un nuevu equipu de medicina y enfermería. Esta midida, posible gracies a la cesión de espacios pol conceyu na Casa de Cultura y una inversión de 31.000 euros, permite habilitar nueves consultes y dar respuesta a les necesidaes crecentes de la población.
La conseyera de Salú, Concepción Saavedra, visitó esti xueves el centru, que pasa de tres a cuatro equipos asistenciales. Esto supón un incrementu del 33% na plantía y una reorganización que fai posible repartir los 5.600 pacientes ente cuatro profesionales de medicina de familia. D’esta manera, la carga asistencial baxa d’unos 1.891 a 1.422 pacientes por equipu, lo que supón una reducción cercana al 25%.
Con esta ampliación, la disponibilidad de cita meyoró notablemente: agora, tres de los cuatro equipos pueden atender en menos de 24 hores. Amás, la reorganización facilita que les xeres de coordinación sanitaria se puedan facer en meyores condiciones.
El presidente del Principáu, Adrián Barbón, anunció nel últimu debate d’orientación política nueves midíes pa reducir los tiempos d’espera en atención primaria, col oxetivu de garantizar que cualquier persona que pida cita seya atendida en menos de 72 hores.
La Conseyería de Salú tien previsto poner en marcha 19 equipos nuevos de medicina y enfermería hasta 2027. Los datos del mes de setiembre amuesen que se fixeron 509.729 actos clínicos en primaria, de los que’l 74,9% realizáronse en menos de 72 hores. L’oxetivu ye superar esti porcentaxe y algamar el cien por cien, pa lo que’l Sespa tien previsto reforzar doce centros más esti trimestre y crear siete cupos nuevos una vez se rematen les obres d’adecuación.
