La Conseyería de Movilidá, Mediu Ambiente y Xestión d'Emerxencies vien d'adxudicar les obres de meyora de la carretera AS-215, ente Tinéu y La Florida, con un presupuestu de 901.744 euros. La actuación, incluyida nel programa pa'l suroccidente, va suponer la renovación de casi la totalidá de la vía, 6,6 kilómetros, pa garantizar más seguridá y confort nel tráficu.
El plazu pa executar los trabayos ye de siete meses y la empresa encargada va ser Arposa 60 S.L.. El proyectu contempla la renovación del firme dende les afueres de la capital tinetense —la travesía urbana ta en bon estáu— hasta'l final de la carretera.
Amás, va actuase nel sistema de drenaxe y van renovase los elementos de seguridá y la señalización, tanto vertical como horizontal.
Esta intervención súmase a otres previstes na zona, como les de la AS-15 ente Calabazos y Casares y dende Cangas del Narcea a La Venta. Nel conxuntu del programa del suroccidente, la inversión supera los 4,4 millones d'euros.
L'Executivu autonómicu movilizó yá más de 60 millones de los 80 millones previstos pa meyorar la rede viaria de conceyos como Tinéu, Cangas del Narcea, Ibias, Allande y Degaña.
