La Conseyería de Movilidá, Mediu Ambiente y Xestión d’Emerxencies vien d’adxudicar les obres de meyora del drenaxe na carretera de Pampiedra (LA-8), en Llangréu, con una inversión de 331.917 euros. La empresa Trabajos Salense S.L. tendrá un plazu de cuatro meses pa executar los trabayos, que s’estenderán ente los puntos quilométricos 1+080 y 1+780 de la vía.
L’actuación tien como oxetivu recoger y canalizar de manera correuta les agües de escorrentía, les filtraciones internes del terrén y tamién les que provienen d’una bocamina na vaguada. Toes elles van dirixise hasta’l fondu del valle, nel cruce cola carretera LA-7, onde van poder verter de forma natural nun regueru.
Con esta intervención preténdese reforzar la estabilidá d’una ladera que, históricamente, s’usó como escombrera pa depósitos de la minería. En 2022 producióse nesi puntu un deslizamientu, polo que dende entós el talud ta controláu con sensores e inclinómetros, un sistema que permite detectar movimientos y anticipase a posibles nuevos corrimientos.
El proyectu inclúi la execución d’una zanja drenante con la fondura precisa pa captar les agües superficiales y les de la bocamina, conduciéndoles per un colector hasta’l regueru.
