La Conseyería de Medio Rural y Política Agraria vien d’entamar el procesu de llicitación d’obres de prevención d’incendios nos montes vecinales en mancomún del conceyu d’Ibias, con una inversión de 186.050 euros.
Les empreses interesaes pueden presentar les sos ufiertes hasta’l 9 d’ochobre. La actuación va cubrir 173,9 hectárees y va permitir caltener 42 cortafueos, infraestructures esenciales pa la defensa frente a los incendios forestales, yá que frayen la continuidá de la vexetación y faciliten les llabores d’extinción y el pasu de los medios d’intervención.
Los trabayos, con un plazu d’execución de diez meses, inclúin la llimpieza mecanizada de los cortafueos, principalmente con bulldozer. Tamién se van facer cortes tresversales pa facilitar la evacuación del agua, nivelación y reparación de baches nos caminos transitables y llimpieza de maleza.
Les obres van desenvolvese nos siguientes montes, xestionaos en conveniu cola alministración del Principáu: Andeo, Barca, Boiro, Braña de Labiada, Braña de Leituelos, Tremo, Bustelo, Caldevilla, Castaosa, Castro Mouroso, Chao da Serra, Confita, Linares, Marentes, Peneda, Penedela, Piñeira, Pousadoiro, Rellán, San Clemente, San Esteban, Sena, Sillón, Carbayal, Torga, Valía Oscura, Villamayor, Villarcebollín, amás del monte d’utilidá pública númberu 151, Sierras de Uria y Marco.
El Gobiernu d’Asturies considera esencial caltener estes infraestructures en bones condiciones pa garantizar la so función preventiva, un compromisu recoyíu nel Pactu pol Medio Rural firmáu en febreru.
