La Conseyería d’Ordenación del Territoriu, Urbanismu, Vivienda y Derechos Ciudadanos reivindica’l trabayu fechu dende agostu de 2023 pa impulsar y recuperar vivienda pública en Siero, tres les declaraciones del alcalde, Ángel García, que atribuía a la anterior llexislatura’l méritu de les actuaciones nel conceyu.
Dende la conseyería recuérdase que la cesión de los terrenes de Les Bellotines, formalizada pol conceyu a finales de 2022, nun garantizaba por sigo sola la construcción de los 44 pisos. Ente esto, cuando Ovidio Zapico asumió la responsabilidá de la conseyería en agostu de 2023, el proyectu taba paralizáu.
Nas primeres xuntes col Ministeriu de Vivienda y Axenda Urbana, avisóse del riesgu de perder los fondos europeos del Plan de Recuperación, Transformación y Resiliencia (NextGenerationEU) pola falta d’avances y los plazos esixentes.
Pa evitar la perda de financiación, la Dirección Xeneral de Vivienda intensificó la xestión técnica y alministrativa, agrupando los terrenes de Les Bellotines y la antigua Escuela de Peritos de Xixón nun únicu lote patrimonial pa facilitar la collaboración público-privada.
El 26 d’abril de 2024, el Conseyu de Gobiernu del Principáu aprobó un gastu de 10.370.000 euros pa impulsar la construcción de 294 pisos d’alquiler accesible pa mocedá: 250 en Xixón y 44 en Les Bellotines. L’operación, financiada con fondos europeos, moviliza una inversión global de 49,3 millones d’euros mediante concesión de derechos de superficie por 75 años.
El 14 de mayu de 2024, publicose nel Boletín Oficial del Principáu la licitación del derechu de superficie, pasu decisivu pa garantizar la execución y la financiación europea. La promoción de Les Bellotines supón una inversión de 5,3 millones y les obres tán a piques de rematar, con entrega prevista nos próximos meses.
En Pumarabule, en Carbayín, movilizose cerca d’un millón d’euros pa rehabilitar 36 viviendes públiques, terminaes en 2020 y entregaes al Principáu en 2021, pero que nunca llegaron a tener inquilinos y sufrieron vandalismu, lo que obligó a nueves intervenciones pa reparar y acondicionar los edificios.
Les obres de rehabilitación de los trés bloques, con doce pisos cada ún, van permitir que les primeres families puedan instalarse en xineru de 2026, incorporando estes viviendes al parque públic d’alquiler social.
La Conseyería destaca l’esfuerciu económicu y de xestión pa recuperar un patrimoniu públic que llevaba años ensin cumplir la so función social. Les actuaciones en Les Bellotines y Pumarabule amuesen el compromisu d’ampliar el parque públic de vivienda en Siero, tanto con obra nueva como con la recuperación de pisos que llevaben años zarraos.
El trabayu fechu permitió evitar la perda de fondos europeos, impulsar promociones públiques d’alquiler accesible y recuperar patrimoniu públic pa ponelo a disposición de quien más lo precisa.
