Esti xueves 7 d’ochobre de 2026, a les 20:30 hores, inaugúrase ‘Ventanes al Prado’ nel emblemáticu edificiu de Tabacalera, nel barriu de Cimavilla, Xixón. La iniciativa, frutu de la collaboración ente’l Muséu Nacional del Prado y l’Ayuntamientu de Xixón, consiste na instalación de 29 reproducciones retroiluminaes d’obres maestres de la pinacoteca madrilana.
L’actu d’apertura va ser de baldre y pa tolos públicos, con música en direutu y xuegos de lluz na plaza del periodista Arturo Arias. ‘Ventanes al Prado’ supón el primer pasu d’un proyectu que busca espardese a otres ciudaes, col oxetivu d’averar el patrimoniu artísticu del Prado al públicu xeneral.
Les obres escoyíes van amosase n’un escenariu bien diferente al orixinal, lo que pretende provocar una mirada nueva y fomentar l’interés pola pintura, los sos autores y les figures representaes. El diseñu curatorial corrió a cargu del estudiu asturianu La Rectoral, dirixíu por Sara Moro y Ricardo Villoria.
La esposición va poder visitase hasta xineru de 2027 y busca poner en diálogu la memoria industrial de Tabacalera cola historia de la pintura española. Amás, la Fundación Municipal de Cultura, xunto col Muséu del Prado, va programar actividaes pa centros educativos y un ciclu de conferencies, col fin d’averar l’arte a la mocedá y al conxuntu de la ciudadanía. Tamién se va editar un catálogu específicu sobre la muestra.
