L'Ayuntamientu de Gijón/Xixón, al traviés d'EMULSA Medioambiente y en collaboración con Ecovidrio y Cogersa, punxo en marcha los díes 9 y 10 d'ochobre una campaña de sensibilización ciudadana pa fomentar el reciclaxe de los envases de vidriu.
Esta iniciativa, integrada na campaña autonómica de reciclaxe de vidriu del branu-iviernu, apostó pol contautu direutu cola ciudadanía y un formatu participativu. L'oxetivu ye recordar la importancia de separar correutamente botelles, tarros y frascos de vidriu y depositalos nel contenedor verde.
La actividá contó con personal especializáu n'educación ambiental y col estand móvil "Vidriandante", pensáu pa dar visibilidá a la campaña y facilitar la interacción en zones de munchu pasu.
Como ferramienta didáctica, emplegóse'l xuegu dixital Vuelta al verde, con preguntes y pequeños retos pa deprender a identificar los residuos que van al contenedor verde. Les persones participantes recibieron una bolsa reutilizable.
La campaña sirvió pa resolver duldes habituales, desmontar falses creencies y amosar de mou práuticu cómo un xestu cotidianu puede ayudar a ahorrar recursos, menguar l'impactu ambiental y avanzar hacia la economía circular.
Tamién se buscó llegar a sectores de población que nun suelen recibir esti tipu de mensaxes polos canales habituales. Esta aición súmase a otres iniciatives d'información y sensibilización sobre la separación de residuos que promueven l'Ayuntamientu, EMULSA, Ecovidrio y Cogersa.
Nel ámbitu del reciclaxe de vidriu, a lo llargo de 2026 desendolcaronse campañes tantu pa la ciudadanía como pa la hostelería, con aiciones adaptaes a los sos hábitos y necesidaes. Destaca la campaña específica pa la hostelería xixonesa, que asesora a los establecimientos na separación correuta de los envases de vidriu y la meyora de la recogida selectiva.
Igualmente, promoviéronse aiciones informatives en zones con potencial pa aumentar el reciclaxe, combinando l'análisis de datos con intervenciones sobre'l terrén. EMULSA mantién una llinia continua d'información y sensibilización sobre otres fracciones de residuos.
Les campañes pa impulsar la recogida separada de materia orgánica y la difusión de mensaxes sobre comportamientos afayaízos na xestión de residuos, como la iniciativa #LoQueSí. #LoQueNo. Tú eliges el Gijón que quieres, busquen consolidar hábitos que favorezan una ciudá más llimpia y sostenible.
Estes aiciones acompáñense de meyores nos servicios y equipamientos municipales, como l'ampliación de la recogida de residuos orgánicos, la estensión de la recogida de restos de xardinería y la puesta en marcha de puntos llimpios de proximidá.
Toles campañes encuádrense dientro del Plan Municipal de Residuos Cero Gijón/Xixón 2025-2030, que marca la ruta pa prevenir y menguar residuos, aumentar la recogida separada, facilitar el reciclaxe y promover la reutilización y la economía circular.
La sensibilización, la información y la facilitación de la separación de residuos son clave pa meyorar los resultaos ambientales. Separar correutamente cada residuu y usar el contenedor afayaízu son aiciones sencilles que, sumaes, contribúin a aprovechar meyor los materiales y menguar la cantidá de residuos que nun pueden recuperase.
EMULSA va siguir collaborando en iniciatives de sensibilización y meyora de la xestión de residuos pa avanzar hacia una Gijón/Xixón más circular, onde prevenir, reutilizar y reciclar seyan hábitos cada vez más presentes.
