El Gobiernu d'Asturies y la empresa Indra llegaron a un preacuerdu pa llogar el taller de Barros, en Langreo, durante 25 años. El pactu, en réxime d'alquiler, supón una inversión mínima de siete millones d'euros nel primer añu.
La propuesta, pendiente de ratificación pola Sociedad Rexonal de Promoción (SRP) y polos órganos de gobiernu d'Indra, permitirá la puesta en marcha d'una nueva fábrica de componentes y productos pa la industria de defensa n'Asturies.
El conseyeru de Ciencia, Industria y Emplegu, Borja Sánchez, y el presidente de la SRP, David González, informaron na Xunta Xeneral sobre los avances pa instalar la planta d'Indra nes instalaciones que'l Principáu adquirirá a Duro Felguera.
Sánchez esplicó que l'acuerdu contempla un arrendamientu de 25 años, lo que garantiza estabilidá y seguridá pa les inversiones industriales previstes. El preciu del alquiler determinaráse por una empresa tasadora independiente acreditada pol Bancu d'España, siguiendo criterios de mercáu.
Indra comprométese a invertir lo necesario pa adaptar y equipar el taller de Barros, con una inversión mínima de siete millones d'euros nel primer añu, pa poner en marcha la so segunda fábrica n'Asturies.
El conseyeru y el presidente de la SRP valoraron el preacuerdu como un pasu decisivu pa consolidar un proyectu prioritariu pa Asturies. "Supón un pasu importante pa facer realidá una inversión estratéxica pa Langreo y pa tol país. Cumplimos el compromisu d'impulsar esti proyectu industrial y avanzamos na creación d'actividá d'altu valor, xeneradora d'emplegu cualificáu y que refuerza'l texíu productivu", destacó Sánchez.
El Gobiernu espera cerrar nes prósimes selmanes la compra del taller a Duro Felguera, por 10,7 millones d'euros, y la cesión en alquiler a Indra.
El complexu de Barros cuenta con cerca de 80.000 metros cuadraos ente edificaciones y árees productives. Indra asumirá les inversiones pa rehabilitar y acondicionar los espacios, destinándolos a la fabricación de componentes pa la industria de defensa.
L'oxetivu del Gobiernu, a través de la SRP, ye reforzar la industria n'un sector estratéxicu, favorecer la creación d'emplegu de calidá y garantizar l'usu productivu a llargu plazu d'unes instalaciones con tradición industrial.
La estratexa autonómica pa la industria de defensa consolidó un polu con empreses como Indra, Santa Bárbara, Rheinmetall y Escribano Mechanical Engineering, amás d'un texíu de pymes.
Según les estimaciones actuales, el proyectu industrial xenerará un impactu económicu directu d'entre 500 y 600 millones d'euros y creará ente 400 y 450 emplegos, direutos y inducíos.
