El Hospital Universitariu San Agustín d'Avilés va poner en marcha en payares un programa pioneru d'atención a domiciliu pa la administración d'alfa-1 antitripsina a pacientes con déficit d'esta proteína. L'oxetivu ye frenar la progresión del enfisema pulmonar asociáu a esta enfermedá xenéutica y meyorar la calidá de vida de les persones afectaes.
La iniciativa, que cuenta cola collaboración de los servicios de Neumoloxía, Farmacia Hospitalaria y Hospitalización a Domiciliu, busca acercar la atención especializada al entornu habitual de los pacientes, evitando desplazamientos periódicos al hospital cada dos o tres selmanes.
El déficit d'alfa-1 antitripsina ye una alteración xenéutica que puede derivar en enfermedaes como l'enfisema pulmonar y la EPOC. El programa ta dirixíu a pacientes que cumplen los requisitos pa recibir tratamientu sustitutivu intravenosu y que, tres una valoración individualizada, pueden beneficiase de la so administración en casa.
Na fase inicial, espérase que la midida beneficie a una decena de pacientes en tratamientu activu, amás de futuros diagnósticos. El seguimientu incluyirá la evaluación de la seguridá del tratamientu, incidencies, desplazamientos evitaos, satisfación de los pacientes y usu de recursos sanitarios.
El protocolu establez que Neumoloxía será responsable de la indicación, siguimientu clínicu y valoración de la enfermedá. Farmacia Hospitalaria va encargase de la xestión, validación y preparación segura del tratamientu, y l'equipu de Hospitalización a Domiciliu de la so administración y vixilancia.
La esperiencia adquirida va permitir consolidar el programa y desenvolver nueves formes de collaboración ente los servicios implicaos.
Esta iniciativa refuerza l'apuesta del hospital pola atención domiciliaria y la humanización, sumándose a otros programes como la quimioterapia a domiciliu pa pacientes con cánceres hematolóxicos, y el próximu programa de tresfusión de sangre en casa pa pacientes con anemia grave y problemes de movilidá.
