La Conseyería de Derechos Sociales y Bienestar, en collaboración cola Fundación Vinjoy, vien de poner en marcha un programa pioneru d'acompañamientu y intervención socioeducativa dirixíu a families con adolescentes que pasen por graves conflictos, vulnerabilidá o deterioru de la convivencia.
L'oxetivu principal ye evitar que estes crisis desemboquen na separación de los menores del so entornu familiar y favorecer, cuando seya preciso, los procesos de reunificación en condiciones segures y estables.
La iniciativa, que s'estenderá hasta'l 31 de mayu de 2027, ta pensada pa hogares con fíos y fíes de 12 a 17 años onde la situación familiar pueda poner en riesgu'l so bienestar emocional y desarrollu. El programa cuenta con una financiación de 93.000 euros por parte de la conseyería y va permitir atender a 25 families.
La intervención desenvuélvese al traviés d'itinerarios personalizaos que combinen sofitu psicosocial, mediación familiar, acompañamientu educativu, orientación social y fortalecimientu de les redes de sofitu comunal, en coordinación colos servicios sociales, educativos, sanitarios y de protección implicaos en cada casu.
Niveles d'actuación
El programa contempla dos niveles d'actuación. El primeru, d'intensidá, ta pensáu pa families en crisis aguda y riesgu de separación, con ente tres y cinco intervenciones selmanales. El segundu céntrase nel siguimientu y consolidación de los avances, con acompañamientu continuu pa afitar los cambeos y evitar recaíes.
La conseyera de Derechos Sociales, Nerea Monroy, y la directora xeneral d'Infancia y Families, Vanesa González, mantuvieron una xunta de trabayu col direutor de la Fundación Vinjoy, Adolfo Rivas, pa facer siguimientu del programa y tratar otres víes de collaboración d'interés común.
«La iniciativa representa xustamente'l modelu d'intervención que queremos afitar n'Asturies: actuar antes de que los problemes familiares s'agraven y acompañar a les families pa superar situaciones mui complexes», valoró la conseyera.
Monroy tamién destacó que la nueva Llei d'Infancia y Adolescencia, aprobada ayeri pola Xunta Xeneral, va reforzar esti enfoque preventivu, priorizando'l sofitu a les families, la intervención temprana y los recursos comunales como ferramientes clave pa garantizar el bienestar y los derechos de la infancia.
Esti programa refuerza la apuesta del Gobiernu d'Asturies poles polítiques preventives y por un sistema de protección que pon el interés superior de la infancia nel centru, promoviendo que neños, neñes y adolescentes crezan, siempre que seya posible, nun entornu familiar seguru, estable y protector.
