La Conseyería de Cultura, Política Llingüística y Deporte publicó güei nel Boletín Oficial del Principáu d'Asturies (BOPA) la concesión de dos llinies d'ayudes que sumen 200.000 euros. L'oxetivu ye doble: reconocer a los y les deportistes d'élite y respaldar a les entidaes que caltienen vivu'l deporte tradicional asturianu.
En concreto, 149.999,67 euros van dir destinaos a los Premios a la Excelencia Deportiva, de los que se beneficiarán 39 deportistes que destaquen a nivel nacional o autonómicu. Otru bloque de 49.998,93 euros va pa 14 clubes, asociaciones y federaciones que promueven modalidaes autóctones como los bolos y el remo tradicional.
Reconocimientu al esfuerciu y la excelencia
Los Premios a la Excelencia Deportiva reconocen la dedicación y l'esfuerciu de deportistes que llegaron a la categoría absoluta d'altu nivel o rendimientu. La ayuda, que se reparte proporcionalmente según la categoría, abónase nun únicu pagu y nun requiere xustificación adicional, más allá de cumplir los requisitos.
El deporte tradicional, señu d'identidá
El Gobiernu d'Asturies tamién refuerza'l so sofitu a entidaes que trabayen pola conservación y divulgación del deporte tradicional. Les ayudes repártense ente 14 clubes y asociaciones que entamen competiciones, actividaes d'iniciación y xornaes divulgatives.
Los bolos, en toles sos modalidaes, y el remo tradicional centren la mayoría de los proyectos escoyíos. Destaquen la VI Lliga Infantil de Bolo Celta, xornaes infantiles de bolos cuatreada, el Campeonatu de Bolos del Muséu del Pueblu d'Asturies y la reedición d'un manual d'iniciación a los bolos cuatreada. Tamién se financien regates pa dar a conocer el remo tradicional asturianu.
Estes subvenciones permiten respaldar competiciones consolidaes y actividaes formatives que acercan estes disciplines a la mocedá. El Gobiernu d'Asturies tien previstu aumentar la inversión deportiva, con compromisos de dos millones pa federaciones, 2,5 millones pa clubes d'altu nivel y 300.000 euros pa deportistes d'élite hasta 2027, col fin de consolidar el sistema deportivo asturianu.
