La Conseyería de Movilidá, Mediu Ambiente y Xestión d'Emerxencies entamó esta selmana les obres de meyora na carretera MO-5, que xune Argame con Pedroveya, nel conceyu de Morcín. L'actuación, con un presupuestu de 1.928.874 euros, va desenvolvese a lo llargo de nueve meses y afecta a un tramu de 9,8 kilómetros.
La UTE formada poles empreses Pavitk 2012 S.L. y Ramadal S.L. va encargase de los trabayos, que inclúin la modernización de la vía, la meyora del drenaxe, la renovación de los sistemas de contención y el reforzamientu de la seguridá viaria.
Les primeres actuaciones céntrense na llimpieza xeneral de la carretera, con desbroce, retirada de vexetación, reperfiláu de cunetes y demolición d'elementos deterioraos. Amás, va renovase'l sistema de drenaxe con 13 caños nuevos, más de 7 kilómetros de cuneta bordillo y zanxes drenantes, sumideros y pasos salvacunetes pa facilitar la evacuación del agua.
Pa estabilizar los puntos con asentamientos, van construyise dos muros: unu de escollera nel puntu kilométricu 0+670 y otru de formigón nel 8+750. La carretera va ser rehabilitada na so totalidá con reconstrucción y refuerzu del firme, fresáu en zones concretes y pavimentación de los accesos.
La intervención inclúi tamién la renovación de les defenses, con más de 4,4 kilómetros de barrera de seguridá nueva, la instalación de 65 señales verticales, paneles direccionales y la reposición de la señalización horizontal y barandilles en mal estáu.
Esta actuación súmase a los 1,1 millones d'euros que'l Gobiernu d'Asturies invierte tamién en Morcín pa la renovación de la MO-1, ente Santolaya y Busloñe. En total, el Principáu destina más de 3 millones d'euros a la meyora de la rede viaria nel conceyu.
