La nueva subestación de Reboria, asitiada en Xixón, y la llinia eléctrica que la va xunir cola subestación de Cardoso, en Carreño, entamen agora'l so periodu d'información pública tres la publicación de los anuncios correspondientes nel Boletín Oficial del Estáu (BOE) por parte del Gobiernu d'España.
Estes actuaciones formen parte de les infraestructures previstes pa reforzar la rede de tresporte eléctricu n'Asturies y responder a les nueves necesidaes enerxétiques venceyaes al desenvolvimientu industrial.
El conseyeru Borja Sánchez, que visitó güei la factoría d'Ence en Navia, remarcó que la apertura d'esti trámite ye frutu del trabayu de coordinación ente'l Gobiernu d'Asturies y Red Eléctrica pa impulsar una infraestructura estratéxica pa la rexón.
Amás, señaló que se trata de la primer subestación y la primer llinia eléctrica incluyíes na futura planificación de la rede de tresporte estatal pal periodu 2025-2030.
Ambes infraestructures entamen la so tramitación antes de la aprobación definitiva del documentu, lo que va permitir avanzar nos procedimientos alministrativos y ambientales, facilitando la complexa tramitación del anillu eléctricu previa a la so construcción.
El proyectu contempla la puesta en marcha de la subestación de Reboria, con una potencia de 400 kilovoltios (kV) nel conceyu de Xixón y una inversión de más de 7,1 millones d'euros, xunto a una llinia aérea de tresporte eléctricu de 400 kV y doble circuitu ente Cardoso y Reboria, de 10,8 kilómetros y una inversión de 8,38 millones d'euros.
El trazáu va pasar pelos conceyos de Carreño, Corvera y Xixón. La subestación de Cardoso, que forma parte de la planificación enerxética actual y dende la que partirá l'anillu eléctricu na zona central d'Asturies, ta anguaño en fase de construcción.
Según la documentación sometida a información pública, dambes infraestructures van contribuir a meyorar la seguridá y la calidá del suministru eléctricu na zona central d'Asturies, aumentar la capacidá de tresporte d'enerxía y facilitar el desenvolvimientu de nuevos proyectos industriales y enerxéticos.
*Foto d'archivu del conseyeru Borja Sánchez durante la visita de la directora xeneral de Redeia, Beatriz Corredor, con motivu de la presentación de les obres de desmantelamientu de la llinia d'alta tensión Lada-Velilla, el pasáu payares.
