El presidente del Principáu, Adrián Barbón, defendió güei en Buenos Aires el papel central de la emigración asturiana pa construyir el futuru d'Asturies. Barbón reclamó el derechu plenu de la ciudadanía española residente nel esterior y animó a ver la diáspora como axente activu del desenvolvimientu cultural, social y económicu del país.
Na inauguración del V Congresu Mundial d'Asturianía, el primeru que se celebra fuera d'España, el presidente llamó a un cambiu de paradigma que reconoza la importancia de la Asturies esterior. Anunció la convocatoria pa l'añu que vien de mocedá de los Centros Asturianos en Montevideo y l'aumentu del presupuestu d'apoyu a estos centros, que pasará de 400.000 euros en 2023 a 800.000 euros en 2027.
Barbón insistió en que la emigración asturiana nun puede siguir viéndose solo dende la memoria histórica, sinón como una realidá viva y vinculada al presente y al futuru del Principáu:
"La Asturies esterior nun ye memoria d'ayeri, sinón parte activa y protagonista del presente y del futuru de la nuesa tierra".
Tamién destacó'l papel d'Arxentina na historia de la emigración asturiana y el valor simbólicu de celebrar el congresu en Buenos Aires.
"Esta ciudá, como Arxentina entera, nun ta nos márxenes de la Asturies esterior; ta nel so corazón".
El presidente llamó a superar cualquier división ente residentes n'Asturies y la diáspora, defendiendo que la identidá asturiana tresciende fronteres y une a toles xeneraciones d'emigrantes.
"Si queremos que les persones emigrantes contribuyan al futuru del Principáu, faigámosles partícipes del nuesu porvenir".
Nel so discursu, defendió la Llei de Nietos y los derechos de los descendientes de la emigración y del exiliu, destacando la so gran acoyida n'Arxentina y la necesidá de garantizar el so derechu a la nacionalidá y a votar.
"Soy partidariu de que toles persones con nacionalidá española puedan votar".
Barbón reafirmó esta postura "con coherencia, firmeza y respetu a la emigración forzada pola dictadura franquista", subrayando que la llei supón una oportunidá de reparación pa miles de families.
El xefe del Executivu destacó tamién el retornu como prioridá de les polítiques del Gobiernu asturianu, recordando que Asturies pasó de ser puertu de salida a tierra d'acoyida y que se refuercen los programes pa facilitar el regresu de quien quiera volver.
"Les puertes d'Asturies tán y tarán siempres abiertes de par en par pal retornu".
Pa rematar, Barbón animó a fortalecer los venceyos ente Asturies y la colectividá esterior dende una visión abierta y integradora.
"Más que guardianes del pasáu, sois y tenéis de ser constructores del futuru".
El V Congresu Mundial d'Asturianía xunta en Buenos Aires a representantes de centros asturianos de dellos países pa reforzar la rellación ente'l Principáu y les comunidaes esteriores y reflexonar sobre'l papel de la diáspora nos retos de futuru d'Asturies.
